Gin-anunsyo sang Israel nga napatay sa ila nga pagpang-atake ang pinuno sang National Security Council sang Iran nga si Ali Larijani.
Si Israeli Defence Minister Israel Katz ang nagsapubliko sa kamatayon ni Larijani, kag sunod man nga ginkumpirma sang Iranian state media.
“The prime minister and I have instructed the IDF to continue hunting the leadership of the terror and repression regime in Iran, and to repeatedly sever the head of the octopus and not allow it to grow,” suno kay Katz.
Ang 67-anyos nga si Larijani amo ang isa sa pinakagamhanan nga tawo sa Iran nga nagauyat sang isa sa pinaka-importante nga posisyon sa Islamic Republic.
Nangin kabahin siya sang transisyon halin sang napatay ang anay Supreme Leader nga si Ayatollah Ali Khamenei sa atake sang Estados Unidos kag Israel sang Pebrero 28.
Antes siya nagsulod sa pulitika, nangin commander siya anay sang Iranian Revolutionary Guards Corps (IRGC) sang tion nga may gyera ang Iran batok sa Iraq sang 1980s.
Nagpangalagad man siya bilang head sang state broadcaster, nangin chief nuclear negotiator, nangin speaker sang parliament sang Iran sa sulod sang 12 ka tuig, kag nangin adviser ni Khamenei halin sang 2004.
Bilang head sang National Security Council, ginakabig siya sang analysts bilang nagapanguna nga decision maker sa Iran.
Sandig sa Israel Defense Forces, napatay si Larijani bangud sang pagbomba sang Israeli Air Force sang area malapit sa Tehran.
“Following the elimination of Khamenei, Larijani consolidated his status as the de-facto leader of the Iranian regime and led the combat efforts against the State of Israel and countries across the region,” pahayag sang IDF.
Si Larijani amo ang pinaka-senior Iranian official nga napatay sang Israel halin sang nagtaliwan man ang ila Supreme Leader sa una nga adlaw sang gyera.#
