Gin-abi-abi sang National Security Council (NSC) ang ginhimo sang pito sa pinakagamhanan nga mga pungsod sa kalibutan ukon ang Group of Seven (G7) nga nagpakita sang ila suporta sa Pilipinas sa tunga sang nagasaka nga tensyon sa West Philippine Sea.
Ini kasunod sang communiqué sang Sabado kun sa diin ang mga lider sang G7 ukon ang Canada, France, Germany, Italy, Japan, United Kingdom, kag United States ang nagpabutyag liwat sang ila mabaskog nga oposisyon sa anuman nga unilateral attempt nga islan ang status quo sa West Philippine Sea gamit ang pwersa ukon coercion.
Para kay National Security Adviser Eduardo Año, ang panindugan sini nga mga nasyon batok sa mga aktwasyon sang coast guard kag maritime militia sa West Philippine Sea ilabi na ang obstruction sa high seas freedom of navigation ang isa ka importante nga pagpakita sang prinsipyo sang international law kag international order nga naka-base sa layi.
”We appreciate the G7’s explicit condemnation of the increasing use of dangerous maneuvers and water cannons against Philippine vessels. This acknowledgment underscores the international community’s recognition of the threats faced by our nation and reaffirms the importance of upholding the rule of law in maritime disputes,” kabahin sang statement sang opisyal.
Suno pa kay Año, ang pagkondenar sang G7 sa paggamit sang water cannons kag delikado nga maneuvers batok sa mga sakayan sang Pilipinas ang nagapakita man nga nahibaluan sang international community ang mga pagpamahog nga gina-atubang sang Pilipinas.
Isa man ini ka panawagan suno sa iya nga itib-ong ang rule of law sa maritime dispute.
Santo pa sa communiqué sang G7 Leaders, wala sang legal nga basehan ang expansive territorial claims sang China. Ila man ginpamatukan ang militarisasyon sang amo nga pungsod kag ang mga coercive kag intimidation activities sini sa kadagatan.
Ginsulit man sang world leaders ang award sang Arbitral Tribunal sang Hulyo 12, 2016 nga isa suno sa ila ka “significant milestone” kag legally binding sa mga partido sa proceedings, kag amo dapat ang basehan para nga matawhay nga maresolba ang away sa kadagatan.
Antes pa man ang statement sang G7, madamo na nga mga pungsod ang nagakondenar sang ginahimo sang China Coast Guard nga nagabomba sang tubig sa Philippine vessels sang pila na ka beses, naggamit sang military-grade lasers, ka ginabalabagan pa ang mga barko sang Pilipinas nga magpatigayon sang resupply missions nga Ayungin ukon Second Thomas Shoal nga sulod mismo sa Philippine Exclusive Economic Zone.
Ang pinakaulihi nga seryoso nga ginhimo sang China amo ang gin-implementar kahapon, Hunyo 15, nga isa ka polisa nga magatugot sa ila coast guard nga i-detain nga wala na sang trial ang kutob sa trespassers sa ila gina-claim nga teritoryo lakip na sa parte sang West Philippine Sea.
Sa idalom lamang sang administrasyon ni President Ferdinand Marcos Jr., nagdangat na sa 153 diplomatic protests ang na-file sang Pilipinas batok sa China apang wala ginsapak sang amo nga pungsod.#
