ILOILO CITY – Magapatigayon sang month-long celebration ang Philippine Statistics Authority may kaangtanan sa pagsaulog sang ika-30 nga tuig nga pagsaulog sang national statistics month.
Sa interview sang Bombo Radyo kay Ro-ann Bacal, Regional Director sang National Economic and Development Authority 6, iya ginpahayag nga ang pagsaulog sang national statistics month sa tagsa ka bulan sang Oktubre ang gin-umpisahan sang 1990 sang nagpaguwa sang presidential proclamation 647 si anay Presidente Corazon Aquino.
Suno kay Bacal, ang national statistics month subong ang may yara sang tema nga “Data Innovation Key To A Better Nation” sa diin sa bug-os nga bulan sang Oktubre, may yara sang patigayunon nga mga aktibidad.
Ginpahayag ni Bacal nga importante ang statistics ilabi na sa pagkuha sang data kasubong sang kabug-usan nga populasyon sang Pilipinas.
Agud nga mas mahapos, mapadasig kag mapasanyog ang pagkuha kag paghatag sang data sa publiko, ginpahayag ni Bacal nga nagakinahanglan man sang mga pagbag-o ukon innovation ilabi na sa mga pamaagi sa data gathering.
Samtang, suno naman kay Nelida Losare, Provincial Statistics Officer sang Philippine Statistics Authority – Guimaras Provincial Statistical Office, iya ginpahayag nga isa ang Pilipinas sa mga pungsod sa Asya nga magapatigayon sang computer-paper combination sa pagpatigayon sang census sa 2020.
Suno kay Losare, ang census sa Pilipinas ang ginapatigayon sa kada lima ka tuig agud nga mahibalu-an ang kabug-usan nga populasyon sang pungsod kag iban pa nga impormasyon.
Ginpahayag ni Losare nga daku nga pagpanghangkat para sa mga personnel nga amo ang nagatipon sang impormasyon paagi sa house to house visitation.
Bangud sini, tion na suno sa natungdan agud nga ipatuman ang pagbag-o sa Philippine Statistics Authority.
May kaangtanan sa national statistics month, maga-umpisa ang month-long celebration sa Oktubre 8 kag magatakop sa Oktubre 30.
Lakip sa mga aktibidad nga patigayunon amo ang statistical display, data privacy orientation, poster making contest, statistical analysis quiz kag iban pa.
