Magahod na ang basketball fans kun ano nga national team ang ila suportahan sa palaabuton nga Paris Olympics!
Kumpleto na ang 12 ka nasyon nga maga-compete sa Olympiada kasunod sang pagdugang sang Spain, Puerto Rico, Greece, kag Brazil nga lunsay nagdaog sa finals sang ila ginpasakupan nga Olympic qualifiers.
Matandaan nga sa FIBA World Cup 2023 una nga ginhatag ang nauna nga spots sa Olympics nga amo ang four-time defending gold medalist nga United States, Canada, Australia, South Sudan, Japan, Serbia, kag Germany. Awtomatiko naman nga ginhatag ang isa ka spot sa host nation nga amo ang France.
Lakip sa balantayan sa Olympiada amo ang Group A nga bug-usan sang world no. 2 nga Spain, Australia, Canada kag Greece.
Ang Canada ang nahatagan na sang bansag nga “Group of Death” bangud sa mapag-on nga roster nga pangunahan sang NBA players nga sanday Shai Gilgeous-Alexander kag Jamal Murray.
Ang Greece naman ang pangunahan ni Giannis Antetokounmpo kag ini ang una nga tion sa sulod sang 16 ka tuig nga makasulod sila sa Olympiada.
Nagapabilin nga heavy favorite ang defending champions nga US nga pamunuan ni LeBron James, Stephen Curry, Kevin Durant kag Kawhi Leonard. Mangin coach sang US si Steve Kerr kag tinguhaan sini nga makabawi matapos napaslawan nga makabulsa sang medalya sa 2023 FIBA Basketball World Cup.#
(Photo: ClutchPoints)
