ILOILO CITY – Nagpaandam ang National Telecommunications Commission (NTC)- Region VI sa tanan nga subscribers sang mga telecommunications companies nga mag-aligmat sa mga text scam kaangay sang pagtanyag sang peke nga trabaho kag solicitations.
Sa interview sang Bombo Radyo kay Atty. Deo Virgil Tan, legal officer sang NTC- VI, iya ginpahayag nga dapat nga i-verify gid anay ang impormasyon nga mabaton.
Mahimo man nga ma-report sa opisina sang NTC- VI agud nga mahangpan sang maayo ang amo nga scam kag malikawan nga matuntuhan.
Dugang pa ni Atty. Tan, mabudlay nga i-check ang numero bangud nga wala sang layi nga nga nagapahanugot nga chekyaron ini.
Kung madumduman, sang nagligad nga bulan, gin-veto ni Presidente Rodrigo Duterte ang hagna nga naga-implementar sang mandatory registration sang tanan nga SIM cards kag social media accounts bangud nga kinahanglan pa nga tun-an.
Katuyuan sang amo nga hagna nga untaton na ang tanan nga electronic kag mobile phone-aided criminal activities kag text scams nga naga-garantiya sang indi delikado kag secure nga mobile phone kag cyberspace use sa pungsod.
Ang masami nga mensahe nga mabaton sang mga telco users amo ang offer sang trabaho nga may dako nga sweldo ukon ang mga mensahe nga may yara sang webpage link.
Sa tion nga i-click ang amo nga link, masarangan sini nga makuha ang data sa imo nga gadget ilabi na kung online ikaw.
Agud nga malikawan ang ini nga sahi sang scam, dapat nga chekyaron online ang credibility sang amo nga link ukon website kag indi gid sa gilayon magpati ilabi na kung indi sigurado.
Dako ang posibilidad suno kay Atty. Tan nga indi na ma-trace ang number sa tion nga makakuha na sang kwarta.
Sang nagligad nga semana, ginmanduan sang NTC ang mga telecommunications companies nga mag-issue sang alerts batuk sa mga spam text messages nga nagatanyag sang trabaho nga may mataas nga sweldo.
Ginmanduan man sang NTC ang tanan nga regional directors kag officers-in-charge nga magpanawagan sa mga local radio kag TV stations agud nga mag-abiso sa publiko sa fraudulent text scams humalin sa Mayo 28 tubtob Hunyo 11 kag magapasa sang compliance report sa Hunyo 15.
