ILOILO CITY – Nagdepensa ang National Telecommunications Commission- Region VI may kaangtanan sa ginpatuman nga signal jamming sa Iloilo City kadungan sang ginpatigayon nga Iloilo Dinagyang Festival 2023.
Ini ang kasunod sang pagpakamalaot sang publiko kun sa diin, magluwas sa Iloilo City, naapektuhan man sang signal jamming ang pila ka mga banwa sa probinsya sang Iloilo kag mangin sa Guimaras.
Sa interview sang Bombo Radyo kay Atty. Deo Virgil Tan, legal officer sang National Telecommunications Commission, iya ginpahayag nga nagsunod lamang sila sa request sang Philippine National Police bilang kabahin sang pagpasiguro sang seguridad sa syudad.
Paathag ni Tan, ang katungdanan nila amo nga mag-monitor kun nagasunod sa ila mando ang mga telecommunications company.
Suno kay Tan, nakadepende sa radius ukon sakop sang tagsa ka cellular site ang maapektuhan nga lugar.
Ginpahayag dugang sang natungdan nga may mga cellular sites nga malapad ang area of coverage gani malapad man ang sakup sang signal jamming.
Nahibaluan nga subong nga adlaw, ginpahayag ni Iloilo City Mayor Jerry Treñas nga indi na niya pag-aprubahan ang request sang Philippine National Police nga magpatuman sang signal jamming sa masunod nga tuig.
