𝗜𝗟𝗢𝗜𝗟𝗢 𝗖𝗜𝗧𝗬 – Nanindugan ang National Union of People’s Lawyers (NUPL) nga matuod nga may nagakatabo nga reward system sa idalom sadto sang Duterte administration.
Sa interview sang Bombo Radyo kay Atty. Joebert Pahilga, founding member sang NUPL, iya ginpahayag nga ang mga dokumento kag testimonya halin sa imbestigasyon sang QuadComm sang Kamara ang nagapakita sang maathag nga sitwasyon sang reward system sang mga pulis sa idalom sang war on drugs ni former President Rodrigo Duterte.
Ini ang sa pihak sang pagpanginwala sang mga kaalyado ni Duterte nga sanday Senador Ronald dela Rosa kag Senador Bong Go nga indi matuod ang reward system.
Suno kay Pahilga, ang nasambit nga sistema ang wala lang basta naga-exist, bangud mismo ang Malacañang ukon ang Duterte administration ang nagapanguna diri.
Mangin si Pahilga ang makapamatuod sini bangud may himata ini nga ginpatay sang mga pulis sa Antique, apang wala nahatagan sang hustisya.
Matandaan nga ginpahayag ni retired police officer kag Philippine Charity Sweepstakes Office general manager Royina Garma, nga may yara sang sistema sang paghatag sang padya sa pagpatay sa mga drug suspect nga ginhingyo sa iya ni Duterte nga magpangita sang opisyal nga magapatuman sang “modelo ng Davao” sang war on drugs sa pungsod.
Nahibaluan nga si Duterte ang madugay naman nga nagpungko bilang alkalde sang Davao City kag nagdaog bilang presidente sang 2016.
Liwat ini nga magapadalagan sa pagka-mayor sang Davao sa 2025 elections.
