ILOILO CITY – Nagpatigayun sang Black Friday Protest ang katapo sang National Union of Students in the Philippines sa West Visayas State University sa La Paz, Iloilo City.
Sa interview sang Bombo Radyo kay Angelica Del Rosario, katapo sang nasambit nga grupo, iya ginpahayag nga tinutuyo sang nasambit nga pagprotesta amo ang pagkamalaot sa natabo nga hazing sa Philippine Military Academy.
Ginapakamalaot man nila suno kay Del Rosario ang padayun nga Red Tagging sa mga organisasyon sa buluthuan.
Suno kay Del Rosario, wala nila naluyagan ang pagpatigayun sang hazing bangud isa ini ka paglapas sang layi kag indi dapat pagpahanugutan ang nagakatabo nga pagpang-abuso.
Nagpanawagan naman si Del Rosario sa mga kabataan nga pakigbatuan kag magpanindugan kontra sa ano man nga pagpang-abuso sang pila ka mga organisasyon sa pungsod.
