ILOILO – Nag-umpisa na ang nationwide monitoring sang Department of Trade and Industry (DTI) agud nga masigurado nga de-kalidad nga mga produkto ang ginabakal sa mga commercial establishment.
Sa bahin sang Western Visayas, may yara sang 13 ka monitoring teams nga gintunga agud nga magpatigayon sang monitoring sa probinsya sang Aklan, Capiz, Iloilo, Iloilo City, Guimaras, Antique kag Negros Occidental.
Sa interview sang Bombo kay DTI-6 Regional Director Rebecca Rascon, iya ginpahayag nga katuyu-an sang nationwide monitoring amo nga mahibalu-an kun nakasulod sa quality standards ang mga produkto kasubong sang steel bars kag tanan nga sahi sang sanitary wares.
Ang mga negosyante nga madakpan nga magalapas sa pagsulundan suno kay Rascon ang may yara sang silot nga paga-atubangon.
Sa 1st offense suno kay Rascon, may yara sang P25,000 nga multa kag sa 2nd offense naman, nagalab-ot sa P32,000 ang multa.
Ginpahayag ni Rascon nga nakadepende sa sirkumstansiya ang igahatag nga silot sa mga madakpan nga nagalapas sa nasambit nga pagsulundan.
Ginpasalig man sang natungdan nga mga pangayaw ang nagabug-os sang monitoring team agud nga malikawan nga may paboranay nga matabo.
