Iloilo – Dako nga huol para sa mga estudyante nga magtabok pinaagi sa pagsakay sa balsa sa Monfort River sa banwa sang Dingle, Iloilo.
Ini matapos nga natiphag ang Monfort Bridge tuga sang paglaslas sang Bagyo Agaton sang Abril 2022 kag tubtub subong wala pa nakay-o.
Sa interview sang Bombo Radyo kay Devine Grace Bagolcol, isa ka college student kag residente sang Barangay Agsalanan, Dingle, Iloilo, iya ginpahayag nga apisar aga ini nagabugtaw, nagaka-late ini bangud madamo man ang nagapila agud magsakay sa balsa.
Suno kay Bagolcol, umpisa nga natiphag ang taytay, nagdoble man ang iya ginaplete.
Nagpanawagan naman ang natungdan sa mga concerned government agencies nga mapadali ang pagkay-o sang Monfort Bridge agud mangin mahapos sa mga kaangay niya nga estudyante.
Nahibaluan nga ang A.D. Pendon Construction & Supply Incorporated ang kontraktor sang amo nga taytay kun sa diin natalana nga matapos ang rehabilitasyon sini sa Abril 19, 2023.
Samtang, patakdan sang suga sang Barangay Poblacion, Dingle, Iloilo ang mga balsa agud magdugang sang seguridad sang mga nagatabok kun gab-i.
Nahibaluan nga may yara sang duha ka mga balsa nga nahamtang sa Monfort River.
Sa interview sang Bombo Radyo kay Punong Barangay Edgar Andora, iya ginpahayag nga gindiskusyunan nila ang pagbutang sang suga subong nga semana.
Suno kay Andora, may yara lamang sang 6-8 ka mga indibidwal ang mahimo magsakay sa amo nga balsa.
Ginpasiguro man sini nga may nagabantay nga tiglawas sang barangay agud nga safe man ang mga nagatabok ilabi na ang mga kabataan.
