Nat'l costume nga gindisenyo sang Ilonggo designer sa Miss Earth 2017, nakakuha sang medalya

ILOILO CITY – Nagdaog ang national costume nga himo sang Ilonggo designer para sa pambato sang Cameroon sa Miss Earth 2017.
Nakuha ni Miss Cameroon Angele Kossinda ang bronze medal para sa African continent, sa national costume competition nga ginpatigayon sa Century Park Hotel Manila.
Ang costume ni Kossinda ang himo ni Krisanto Frias, isa ka designer nga tumandok sang Barangay Ticud, La Paz, Iloilo City.
Sa interview sang Bombo Radyo kay Frias, isa ka gab-i lang sini nga ginhimo ang costume.
May dala nga costume si Miss Cameroon apang naguba bangud sa biyahe kag indi kuntento sa design rason nga iya ini ginpaliwat.
Dugang pa ni Frias, naghibi pa si Kossinda antes ang show kagab-i sa pagdumdom nga wala ini sang masuksok bangud naatrasar ang designer sa pagdul-ong sang costume sang beauty queen bangud sang traffic.