Nagpaandam ang North Atlantic Treaty Organization (NATO) nga nagahanda na ang Russia sang ‘full-scale attack’ sa Ukraine.
Suno kay Bombo International Correspondent Genevive Dignadoce, direkta sa Russia, gin-anunsyo ni NATO chief Jens Stoltenberg nga nakasulod na sa border sang Ukraine sa separatist-controlled city sang Donetsk ang malaba nga convoy sang tangke de giyera, armored personnel carriers kag mga military truck sang Russia.
Ini ang kasunod man sang pagkilala ni Russian President Vladimir Putin sa Donetsk kag Luhansk bilang mga independent state.
Una naman ginpahayag sang Kremlin nga ‘peacemaking mission’ lang ang katuyuan sang pag-inabot sang ila tropa sa nasambit nga lugar.
Nahibaluan nga gin-agaw sang Moscow ang Crimea peninsula sa Ukraine sang 2014 kag gin-gatungan ang separatist conflict sa eastern areas sa sulod sang walo ka-tuig nga nagresulta sa kamatayon sang kapin 14,000 indibidwal.
Wala naman ginkalipay sang iban nga mga pungsod ang mga tikang nga ginahimo subong sang Russia rason nga gin-anunsyo naman sang United Kingdom ang economic sanction nga ila gindagdag sa Russia.
Nagpaggwa naman sang executive order si US President Joe Biden agud utdon ang ila mga investment sa Donetsk kag Luhansk.
Gin-anunsyo man sang Estados Unidos ang economic sanctions nga ila gindagdag sa Russia.
Gina-istoryahan naman sang European Union kun ano kadako ang idagdag nila nga trade sanctions ilabi na nga trading partner man nila ang Moscow.
Bangud sa sensitibo nga sitwasyon sa border sang Ukraine kag Russia, bantay sarado na sang bilog nga kalibutan ang nagakahinabo sa rehiyon.
