𝗜𝗟𝗢𝗜𝗟𝗢 𝗖𝗜𝗧𝗬 – Nagpagwa sang open letter si former Iloilo City Councilor Plaridel Nava II kay Presidente Ferdinand ‘Bongbong’ Marcos, Jr.
Ini ang kasunod man sang paghatag ni Presidente Marcos sang executive clemency kay former Iloilo City Mayor Jed Patrick Mabilog.
Sa interview sang Bombo Radyo kay Nava, iya ginpahayag nga madamo siya sang mga screen shots nga nagapamatuod nga nagakampanya si Mabilog batok kay Presidente Marcos sang tinalikdan nga 2022 presidential elections.
Suno kay Nava, sa nasambit nga mga screen shots, gintawag ni Mabilog si Presidente Marcos bilang ‘World’s Greatest Thief’.
Apang suno kay Nava, ang nasambit nga mga posts ang na-delete na.
Pamatuod diri nga Marso 3, 2021 ang umpisa sang post ni Mabilog, apang ang masunod nga post ang may petsa na nga ang Agusto 3, 2024.
Nagakahulugan nga ang mga posts ni Mabilog sang Marso 4, 2021 tubtob Agusto 2, 2024 ang naubos na panas.
Nahibaluan man sang mga Ilonggo suno kay Nava nga si Mabilog ang kilala nga nagakampanya sa Leni Robredo-Kiko Pangilinan tandem.
Una diri, ginkumpirma man ni Nava nga magadangop siya sa Korte Suprema agud i-challenge ang executive clemency nga ginahatag ni Presidente Marcos kay Mabilog.
Ang executive clemency ang kaangot lang sa desisyon sang Office of the Ombudsman bangud sa “dishonesty” kaangot sa iya ginapahayag tago nga manggad nga gin-file ni anay Iloilo Provincial Administrator Manuel ‘Boy’ Mejorada.
Bangud sa executive clemency, mahimo na nga magpadalagan si Mabilog sa anuman nga posisyon sa gobyerno.
