Gina-imbestigaran na sang Armed Forces of the Philippines (AFP) ang ginhalinan kag kun ano ang tuyo sang underwater drone nga may Chinese markings nga nakit-an sa kadagatan sa Masbate.
Tatlo ka mga manugpangisda ang nakakita sang drone sa dagat nga sakop sang Barangay Iniwaran sa San Pascual, Masbate sang Disyembre 30.
Gintugyan ini sa barangay officials, ginpalab-ot sa municipal police, kag gin-turn-over sa militar partikular sa Philippine Navy para sa dugang nga inspeksyon.
Anum ka tapak ang drone kag himo sang PVC kag metal nga may marka nga “HY-119” apang deactivated na sang nadiskubrehan ini sa Pilipinas.
Suno sa Philippine National Police Regional Office 5, ginasuspetsahan sang mga imbestigador nga isa ini ka Chinese underwater navigation kag communication system kun basehan ang itsura sini.
Indi pa matumod sang otoridad kun ano kadugay na ang drone sa dagat sang Pilipinas kag kun sa diin ini una nga gin-deploy.
May duha ka maritime security experts nga nagplastar nga possible nga ginpadala ang drone sa underwater terrain sang Pilipinas para sa military purposes lakip na sa possible deployment sang China sang submarines sa dagat sang Pilipinas.
