Ginpasakaan sang kaso kriminal ni Miss Grand International (MGI) president Nawat Itsaragrisil si newly crowned Miss Universe 2025 Fatima Bosch sang Mexico angot sa “repeated defamatory statements” sini batok sa iya.
Nagpasaka sang kaso kriminal si Miss Grand International (MGI) President Nawat Itsaragrisil batok kay Miss Universe 2025 Fatima Bosch sang Mexico matapos gin-akusar ang kandidata sang “repeated defamatory statements” nga nakaguba sa iya reputasyon.
Suno sa apat ka panid nga police incident report nga ginpabutyag sang MGI sa social media, personal nga nagpadulong si Nawat sa Wat Phraya Krai Police Station sa Bangkok sang Nobyembre 12 agud ireklamo si Bosch.
Ginpahayag sini nga ang mga ginhambal sang Miss Universe winner wala sang kamatuoran kag nakatuga sang halit sa iya pangalan sa Thailand kag apisar pa sa iban nga pungsod.
Nadiskubrehan nga ang reklamo nag-ugat sa insidente nga natabo sa ikaduha nga adlaw sang Miss Universe 2025 pageant.
Matandaan nga nagsabtanay sanday Nawat kag Bosch matapos ginpahayag ni Miss Mexico nga indi siya luyag magpasakop sa isa ka sponsored shoot.
Suno sa report, natabo ang inaway sa atubang sang iban pa nga mga kandidata.
Ginkumpirmar man sang MGI nga indi matuod ang akusasyon ni Fatima Bosch nga gintawag siya ni Nawat nga “dumbhead.”
Suno sa organisasyon, wala ini nahambal sang MGI President kag indi husto ang ginalantaw nga rason sang pag-walk out sang kandidata pagkatapos sang insidente.
Si Nawat Itsaragrisil ang nagauyat sang local Miss Universe franchise sa sulod sang lima ka tuig kag sa subong nagaserbe siya bilang Vice President for Asiana sa Miss Universe Organization.
