Balantayan kun masustiner sang Cleveland Cavaliers ang ila matinlo nga 15-0 record sa ila pag-atubangay sang defending champion nga Boston Celtics alas otso buwas sa aga, Nobyembre 20, oras sa Pilipinas.
Semi-finals sa Eastern Conference sa NBA playoffs sang nagligad nga tuig sang katapusan nga nagkit-anay ang duha ka teams.
Sang amo nga tion, madamo sang injuries sa roster sang Cavs kag ginlutos sang Celtics sa lima ka hampang tubtub nga dalayon nga naka-abanse ang Boston sa finals kag nakuha ang NBA crown batok sa Dallas Mavericks.
Apang impresibo subong ang hulag sang Cavaliers nga wala pa sang kalutusan sa 15 ka mga hampang sa regular season sa idalom sang bag-o nga coach nga si Kenny Atkinson.
Excited na sila sa rematch suno kay Atkinson apisar nga sila ang pangayaw bangud may homecourt advantage sanday Jayson Tatum sa Boston Garden.
Ang katapusan nga ginlutos sang Cavs amo ang Charlotte Hornets, 128-114, kahapon sang aga apisar nga wala si All-Star guard Donovan Mitchell nga amo ang ila scoring leader.
Ang Cavs amo ang ika-apat ka team sa maragtas sang NBA nga nag-umpisa sang season nga may record nga 15-0.
Ini nga winning streak amo na ang pinakamalaba sa 55 ka tuig nga history sang Cavs sa liga nga lapaw pa sa 13-win runs nga nahimo sang team sang yara pa sa ila ang subong Lakers superstar nga si LeBron James.
Malayo pa ang ila lalagson sa record nga iya sang Golden State Warriors nanday Stephen Curry nga may 24-0 record sang 2015-2016 season.#
