Apisar sang season-high nga 54 points nga ginbubo sang two-time NBA Most Valuable Player (MVP) nga si Giannis Antetokounmpo, ginkabos pa ang Milwaukee Bucks kag nalutos sa kamot sang Indiana Pacers, 126-124.
Nagpanguna sa Pacers si Tyrese Haliburton nga may 29 points kag 10 assists; Bennedict Mathurin nga may 26 points kag 11 rebounds; kag Myles Turner nga may 21 points kag 6 rebounds.
Photo: Giannis Antetokounmpo/FB
Ini man ang ikalima nga sunod-sunod nga hampang nga lapaw sa 120-puntos ang gin-skor sang Indiana.
Ika-pito nga tion naman ini sa karera ni Antetokounmpo nga nakapaulan ini sang 50-points pasaka sa hampang sa regular season.
Sa nagligad nga sambuwa sang Bucks batok sa Detroit Pistons, ginpaguwa ang Greek superstar kasunod sang duha ka “unsportsmanlike technical fouls”.
Sa sini nga match, nagbawi ang Milwaukee superstar kag bug-os kusog sini nga ginhakwat ang team paagi sa 26 puntos sa first half kag 20 sa sulod lamang sang third quarter.
Sa ulihi nga bahin sang hampang, nagmato-mato ang Bucks nga wala ang head coach nga si Adrian Griffin matapos gin-eject man ini sa third quarter.
Apisar sang 10 puntos pa nga abanse nanday Antetokounmpo sa pagsugod sang fourth quarter, nagdasig kag nakalagas ang Pacers lakip na ang tres ni Haliburton sang 1:29 na lamang ang nabilin sa oras.
Magluwas sa Greek Freak, nakabubo man si Khris Middleton sang 19 puntos para sa Bucks kag nagdugang si Malik Beasley sang 13, samtang wala naman nakabulig hakwat sa Bucks si Damian Lillard bangud sa iya nga calf injury.
Sunod nga atubangon sang Bucks, 5-3 na subong nga season, ang Orlando Magic, samtang makasumpong naman sang Pacers (6-3) ang Philadelphia 76ers. #
