Ginlutos sang reigning champion nga Boston Celtics ang Cleveland Cavaliers sa ila ikatatlo na nga pagkit-anay subong nga regular season sang National Basketball Association (NBA).
Nanguna si Jayson Tatum nga may 22 puntos sa 112-105 nga kadalag-an sang Celtics.
Ginbansagan ini nga heavyweight showdown bangud nagapangauna ang Cavaliers sa Eastern Conference samtang nagapangaduha naman sa current rankings ang Boston.
Lima sa players sang Celtics ang nakalab-ot sa double figures lakip na si Derrick White nga may 20 points lakip ang anum ka three-pointers, si Kristaps Porzingis nga may 19 points, kag si Jaylen Brown nga may 16.
Sa pihak nga bahin, na-usik naman ang 31 points nga ginbubo ni Donovan Mitchell para sa Cleveland.
Ini man ang nagtuldok sa four-game winning streak sang Cavs.
Sa tatlo ka beses nga nagkitaay sila subong nga season, duha ang nadag-an sang Celtics. Sunod sila nga magakitaay sa Pebrero 28 sa Boston.
