Magaretiro na sa professional basketball ang National Basketball Association champion kag Hall of Famer nga si Dwight Howard.
Suno pa sa anay basketball superstar, panahon na para magpadayon kag ihatag sa masunod nga henerasyon ang iya nahibaluan sa nasambit nga sport.
Suno kay Howard, may ara pa siya kuntani sang mahatag sa basketball, apang nagapati siya nga ang iya bag-o nga responsibilidad amo ang pagpaambit sang iya eksperyensya kag nahibaluan sa masunod nga henerasyon sang mga manug-hampang.
Nahibaluan nga nagsugod ang karera ni Howard sa National Basketball Association sang ginpili siya bilang first overall pick sang Orlando Magic sa 2004 NBA Draft.
Nangin player man ini sang Houston Rockets, Atlanta Hawks, Charlotte Hornets, Washington Wizards, Philadelphia 76ers, kag Los Angeles Lakers.
Isa sa iya pinakadako nga kadalag-an amo ang pagdaog sang 2020 NBA Finals upod sa Los Angeles Lakers.
Nakabaton man ini sang tatlo ka Defensive Player of the Year awards, kag napilian bilang All-Star kag All-NBA player sang walo ka beses.
Sa kabug-osan sang iya karera sa NBA, nakarekord si Howard sang 19,485 points, 14,627 rebounds, kag 2,228 blocks, nga nagapakita sang iya dako nga kontribusyon sa basketball antes sini ginpasapubliko ang iya pagretiro.
