Wala nagahinulsol ang Golden State Warriors star nga si Draymond Green sa ginhimo sini sa player sang Minnesota Timberwolves nga si Rudy Gobert apisar gin-suspend pa siya sang NBA sa sulod sang lima ka hampang.
Kun matandaan, duha ka minutos pa lamang ang hampang sang Timberwolves kag Warriors sa San Francisco sang natabo ang headlock incident.
Una nga nagkumpruntahanay sanday Klay Thompson kag Jaden McDaniels, kag sang nagpalapit si Gobert sa duha, madasig man nga nagpalapit si Green, gin-liab si Gobert kag madugay pa nga ginbuy-an apisar madamo ang nagabulag sa ila lakip na si Coach Steve Kerr.
via NBA Sports Bay Arena
Ginpaguwa sa hampang sanday Thompson, McDaniels kag Green kag ginmultahan man sanday Gobert, Thompson kag McDaniels sang tag-P1.3-million bangud sa insidente.
Pahayag ni Green, gindepensahan lamang niya ang iya nga teammate bangud suno sa iya, 12-anyos na niya nga teammate si Thompson kag ginakabig na niya ini nga utod.
“I’ll come to a teammate’s defense any time that I’m in a position to come to a teammate’s defense. … What matters to me is how the people that I care about feel, first and foremost. How are the people that I care about affected? How are the people I care about, what do they have to deal with? That’s it for me.”
Ginsiling pa sini nga indi patas para sa iya nga gin-cite pa sang NBA ang iya history sang “unsportsmanlike acts” sang ginpapanaog ang suspensyon bangud suno sa iya, nabayaran na niya ang iya una nga mga sala.
Mahimo na makabalik si Green sa hampang sang Warriors batok sa Sacramento Kings sa NBA In-Season Tournament nga naka-schedule buwas, 11:00 sa aga, oras sa Pilipinas. #
