Ginapahayag gin-trade na sang Brooklyn Nets ang 13-time All-Star nga si Kevin Durant sa Phoenix Suns.
Nalab-ot ang amo nga agreement pila ka adlaw lamang matapos nga gin-trade man sang Nets ang ila star guard nga si Kyrie Irving sa Dallas Mavericks.
Nagdugang ang 34-anyos nga basketball superstar sa starting lineup sang Suns kun sa diin yara na nga daan sanday Chris Paul kag Devin Booker kag center nga si Deandre Ayton.
Bilang baylo kay Durant, mabaton sang Nets ang forwards nga sanday Mikal Bridges, Cameron Johnson kag Jae Crowder kaupod ang apat ka first-round draft picks. Maangkon naman sang Suns ang forward nga si T.J. Warren halin sa Nets.
Nakadaog na si Durant sang duha ka National Basketball Association (NBA) championships sang yara pa sa Golden State Warriors; nakakuha sang NBA Most Valuable Player honor sang 2013-2014; kag isa man ka 13-time All-Star.
Apisar naga-edad na sang 34-anyos, ginalaragway nga sa “elite level” sa gihapon ang kalidad sang hampang ni Durant nga naga-average sang 30 points per game sa sini nga season.
Wala pa nakaagi daog sang NBA Championship ang Phoenix. Nakalab-ot ini sa Finals duha ka season na ang nakaligad apang ginlutos sang Milwaukee Bucks. Nakahampang man ang team sa Finals sang 1976 kag 1993.
