Balantayan 8:30 subong nga aga oras sa Pilipinas ang imbukada nga hampang sa tunga sang Denver Nuggets kag Miami Heat sa National Basketball Association (NBA) Finals.
Patigayunon ang Game 1 sa Ball Arena, home court sang Denver Nuggets.
Ang Heat ang ikaduha nga No. 8 seed sa maragtas sang liga nga nakadangat sa Finals paagi sa paglutos sini sa No. 1 seed nga Milwaukee Bucks sa first round kag sa No. 2 seed nga Boston Celtics sa Eastern Conference finals.
May yara na ini sang tatlo ka titulo kun sa diin ang pinakaulihi ang nakuha sang 2013.
Ang Nuggets naman ang No. 1 seed sa Western Conference kag nakasulod sa Finals sa labing-una nga tion sa ila nga franchise history matapos wala ginpabutwa sanday Lebron James sang Los Angeles Lakers sa conference finals.
Sa hampang subong nga aga, lauman nga indi gihapon makahampang ang Miami Heat guard kag 2021-2022 NBA Sixth Man of the Year nga si Tyler Herro bangud sa injury.
Suno sa Filipino-American coach sang Heat nga si Erik Spoelstra, posible nga makabalik si Herro sa best-of-seven finals series apang indi pa anay sa Game 1.
Matandaan nga nakaangkon sang injury sa tuo nga kamot si Herro kag nagpaidalom sa surgery kasunod sang hampang sang Heat batok sa Milwaukee Bucks. #
