Nagbalik na sa practice ang Golden State Warriors forward nga si Draymond Green isa ka adlaw makaligad ang pag-reinstate sa iya sang National Basketball Association (NBA) kasunod sang suspensyon sa 12 ka mga hampang.
Gin-bangko man ang 33-anyos nga player kag nagalantaw lamang ini sang nalutos ang Warriors sa kamot sang pangayaw nga Toronto Raptors kahapon sa Chase Center sa San Francisco.
Indi man sigurado si Golden State Coach Steve Kerr kun san-o makasaka liwat sa hampang si Green apang sa subong, nagatutok ini anay sa regular shooting routine. Gina-evaluate man ang iya fitness para sa sambuwa sa basketball court.
Disyembre 12 sang natabo ang katapusan nga pagpalayas kay Green sa hampang bangud sa foul sini batok sa Phoenix center nga si Jusuf Nurkic. Antes sina, nasuspinde man si Green sa sulod sang lima ka hampang sang Nobyembre bangud sa pagliab sa Minnesota big man nga si Rudy Gobert.
Suno sa NBA, antes gin-reinstate si Green, nagpakigkita ini sa counselor kag may mga meetings man kaupod ang mga tiglawas sang liga, Warriors, kag NBA Association.
Nangin kabahin si Green sa apat ka kampyonato sang Warriors apang kun basehan ang rekord sa iya karera, 18 ka beses na ini nga napahalin sa hampang kag amo ang pinakamataas nga rekord sa tanan nga aktibo nga NBA players subong.
