Bag-o lang nakabalik sa hampang kag naka-recover sa injury ang former NBA-Most Valuable Player nga si Joel Embiid apang kinahanglan naman sini liwat nga magpahuway matapos nagsuprer sang sinus fracture.
Natabo ini sa 30-anyos nga superstar center sa hampang sang Philadelphia 76ers batok sa Indiana Pacers kun sa diin nalutos sanday Embiid, 121-107.
Tuyo kuntani sang big man nga mag-rebound apang naigo ang iya nawong sang siko ni Bennedict Mathurin sang Indiana. 12 puntos pa lamang, four rebounds, kag five assists ang nahimo sang Cameroon native sang amo nga tion apang kinahanglan na sini magguwa antes ang half-time.
Sunod nga ginkumpirma sang Sixers nga na-diagnose ini nga may sinus fracture kag kinahanglan ang evaluation subong nga weekend.
Ang sinus fracture amo ang pagkabali ukon crack sa tul-an nga nagapalibot sa sinuses nga posible tuga sang facial trauma ukon mabug-at nga impact. Ini nga injury ang mahimo magresulta sa seryoso nga mga kumplikasyon kaangay sang sinus infections, kabudlay sa pagginhawa, kag facial deformity kun indi ma-treat sang maayo.
Nahibaluan nga ini pa lamang kuntani ang ikaduha nga hampang ni Embiid matapos wala nakaupod sa pito ka sambuwa subong nga season.
Sang 2017-2018 season, nagsuprer man si Embiid sang orbital bone fracture. Ginsundan ini sang injury sa Game 6 sang first-round playoff game sang Philadelphia batok sa Toronto sang 2022.
