Ginkumpirma sang reigning NBA Most Valuable Player nga si Joel Embiid nga nagasuprer ini sang Bell’s palsy ukon isa ka sahi sang paralysis sa nawong nga nag-apekto sa iya kondisyon halin pa sang play-in tournament.
Kasunod sang pag-skor sini sang 50-puntos sa hampang sang Philadelphia 76ers batok sa New York Knicks sa Game 3, nagsuksok ang nasambit nga All-Star center sang sunglasses.
Ginsiling man sini nga lain-lain nga sintomas ang yara sa iya kaangay sang nagaburon nga panan-awan, nagamala na nga mata, kag nagaluyloy pa ang isa ka side sang iya nga nawong.
Nagsugod ini suno sa iya antes ang hampang sang Sixers batok sa Miami Heat sang Abril 17 sa play-in tournament.
Sang amo nga tion, may 23 points kag 15 rebounds siya sa amo nga hampang nga amo man ang rason nga nadala ang Sixers sa nagapadayon nga playoffs.
Wala sang timetable si Embiid kun san-o siya maka-recover sa Bell’s palsy apang posible suno sa iya nga sinemana ukon binulan pa base sa ila una nga na-istoryahan.
Nahibaluan nga may average si Embiid nga 34.7 points, 11.0 rebounds, 5.6 assists per game subong nga season.
Nakaangkon man ini anay sang injury sa wala nga tuhod nga rason nga wala ini nakahampang sa Enero 30-Abril 2 kag ang pagbalik sini amo ang hampang batok sa Oklahoma City Thunder.
Balantayan ang Game four sa best-of-seven series sa tunga sang 76ers kag Knicks sa Philadelphia sa Lunes, 1:00 sa kaagahon oras sa Pilipinas.#
