Gina-imbestigaran sang National Basketball Association (NBA) ang isa ka insidente kun sa diin ginaalegar nagpangtiklod sang columnist ang Philadelphia 76ers superstar nga si Joel Embiid samtang yara sa locker room.
Ginapahayag nga natabo ang kumprontasyon matapos nalutos ang 76ers sa kamot sang Memphis Grizzlies, 124-107.
Nag-ugat ang isyu sa ginsulat sang Philadelphia Inquirer columnist nga si Marcus Hayes kun sa diin ginmensyonar ang bata ni Embiid kag ang napatay sini anay nga utod — pareho nga ginhingadlan nga si Arthur — samtang ginakwestyon man ang pagka-propesyunal sang former MVP kag ikasarang sini nga ipabilin ang ikaayong lawas.
Ginaalegar nga sang nagsulod ang reporters agud mag-interview sa players, ginsukmaan ni Embiid ang columnist kag nagpaandam sang kunsekwensya pananglitan liwaton sini ang pagmensyonar sa iya bata kag utod.
Sa inisyal nga reports, nag-sorry pa ang journalist apang nagpanginit ang basketball star bangud indi ini ang una nga bes nga natabo ini.
Sang gintiklod na sini si Hayes, didto na kag nagpatunga ang security guard.
Ang hampang sang 76ers batok sa Grizzlies amo na ang ikalima nga sunod-sunod nga game subong nga regular season nga wala nakaupod si Embiid bangud sa iya left knee injury.
Pareho sila ni Paul George (may bone bruise sa wala nga tuhod) nga wala pa nakahampang sa imbukada sang season.
Si Embiid nga amo ang 2023 NBA Most Valuable Player ang nagpaidalom sa operasyon sa wala nga tuhod matapos ang injury sang Enero rason nga nalimitahan lamang sa 39 games sang nagligad nga season. Nakabalik siya sang Abril kag nakaupod sa anum ka games sang Philadelphia sa first-round sa playoffs batok sa New York Knicks.
Ginbuligan man sini ang Team USA nga makadaog sang gold medal sa Paris Olympics apisar sang natabo nga injury.
Nalubong ang Sixers sa 1-4 nga record sa pagbukas sang regular season subong nga tuig.#
