Gin-suspend sa isa ka hampang si Sacramento Kings forward Trey Lyles samtang ginmultahan naman sang $25,000 si Milwaukee Bucks center Brook Lopez bangud sang on-court altercation.
Natabo ang away sa fourth quarter sang hampang sang Milwaukee batok sa Sacramento kun sa diin daog ang Bucks,133-124.
Na-foul ni Lyles si Milwaukee star Giannis Antetokounmpo kag gintiklod ang two-time NBA Most Valuable Player sa likod.
Gilayon nga ginkumpronta ni Lopez si Lyles kag naglab-ot pa sa pisikalanay nga kinahanglan pa nga untaton sang ila mga kaupdanan sa hampang.
May duha ka technical foul si Lyles kag ejected samtang si Lopez naman ang may isa ka technical foul kag ejected.
Pagkatapos sang hampang, ginpahayag ni Antetokounmpo nga wala siya sang ideya kun ano ang natabo apang nagsugot na ini nga i-reimburse si Lopez sa multa bangud nahangpan niya nga gin-depensahan lang siya sini.
Nahibaluan nga ang Bucks ang nagaangkon sang best record sa NBA nga may 50-19 samtang pangatlo naman ang Kings sa Western Conference nga may 40-27.
