Ginbantayan subong nga aga ang pagbalik sang basketball superstar guard nga si Luka Doncic sa Dallas, Texas, USA indi bilang isa ka Maverick kundi isa na ka kasumpong.
Ini ang una nga bes nga maga-bisita si Luka sa Dallas halin sang natabo ang blockbuster trade sang Pebrero 2, 2025 nga amo ang nagsaylo sa iya sa Los Angeles Lakers kabaylo sa 10-time All-Star nga si Anthony Davis.
Ini naman ang una nga tion nga magahampang si Davis kaupod ang Dallas batok sa Los Angeles. Kun matandaan, nagsuprer siya sang injury sang una nga nagkit-anay ang duha ka teams sang Pebrero 25.
Ang Dallas ang nagdaog sang titulo sa Western Conference sang nagligad nga season, apang nagapang-10 ini subong sa standings. Ang Lakers naman ang nagapangatlo subong sa conference.
Antes sini nga hampang, ginpaguwa si Luka sa hampang sang Lakers batok sa Oklahoma City Thunder bangud sa iya ikaduha nga technical foul. Nalutos ang Lakers sa amo nga game sa skor nga 136-120.
Kinahanglan nga daugon sang Lakers ang duha sa ila nabilin nga tatlo ka mga hampang agud nga makakuha sang pwesto sa West.
