Eligible pa si Los Angeles Lakers guard Luka Doncic sa end-of-season awards sang NBA.
Ini matapos nagsugot ang National Basketball Players Association nga ma-bypass ang patakaran nga dapat nakahampang gid ang player sang 65 games antes mangin maka-qualify sa amo nga pasidungog.
Sa kasugtanan sang NBA, dapat nga may “extraordinary circumstances” antes makapetisyon ang player nga malakip siya sa mahimo makabaton sang award bisan nga wala sini nalab-ot ang 65-game minimum requirement.
Nakahampang si Doncic sang 64 games sa regular season, apang wala na ini nakapadayon bangud sa injury.
Magluwas kay Doncic, may pareho man nga pribilehiyo nga ginhatag kay Detroit Pistons guard Cade Cunningham nga nakahampang sa 63 games kag wala naka-upod sa 12 games matapos nag-collapse ang baga sini sang Marso.
“The NBA and NBPA agreed that, taking into account the totality of the circumstances for Cunningham and Dončić, each player qualified for awards,” suno sa league kag union sa ginpagwa nga statement.
Nagpasalamat naman ang Slovenian superstar sa pribilehiyo, kag ginpaathag sini nga kinahanglan gid sini nga mangin present ilabi na sang ginbun-ag ang iya bata sang Disyembre.
“I am grateful to the NBPA for advocating on my behalf and to the NBA for their fair decision,” suno sa post ni Doncic sa X. “It was so important to me to be present for the birth of my daughter in December, and I appreciate Mark, Jeanie, Rob, JJ, and the entire Lakers organization for fully supporting me and allowing me to travel to be there.”
Nahibaluan nga ini nga patakaran sang NBA ang nangin mainit nga diskusyon subong nga season bangud palareho nga wala nakalab-ot sa 65-game threshold ang players kaangay kanday Giannis Antetokounmpo, Stephen Curry, LeBron James, kag Devin Booker.
