Naglab-ot na sa 18 ka triple double ang nahimo sang Nuggets superstar nga si Nikola Jokic subong nga regular season sa NBA.
Ang pinakaulihi amo ang iya nga 20 points, 14 rebounds kag 10 assists kadungan sang pagpangayaw sang Denver Nuggets kag paglutos sa Orlando Magic 113-100.
Si Jokic amo subong ang nagapanguna sa liga sa triple-doubles, kag ang nagapangaduha amo si LeBron James nga may walo ka triple-doubles para sa Los Angeles Lakers.
Sa hampang kontra sa Magic, wala na siya nagsulod sa fourth quarter apang bastante ang puntos sang iya mga kaupdanan agud mapadaog ang Denver. Nagdugang si Christian Braun sang 20 points, si Jamal Murray nga may 19 points, kag Michael Porter Jr. nga may 15.
Short-handed naman ang Orlando sa amo nga game bangud wala si Jalen Suggs (back injury), Gary Harris (hamstring), Franz Wagner (reconditioning) kag Goga Bitadze (concussion protocol).
