Duha ka do-or-die games sa National Basketball Association (NBA) playoffs ang balantayan subong nga adlaw, Abril 30.
8:30 subong nga aga (oras sa Pilipinas), maga-atubangay ang top-seeded nga Oklahoma City Thunder kag ang eighth-seeded nga New Orleans Pelicans sa Game 4 sang Western Conference first-round matchup.
3-0 na subong ang serye kag tuyo sang Oklahoma nga ma-sweep ang New Orleans kaangay sang ginhimo nanday Anthony Edwards kag Minnesota Timberwolves sa team ni Kevin Durant nga Phoenix Suns kahapon, Abril 29, 4-0.
Sang weekend, daog ang Thunders, 106-85.
Pananglitan magmadinalag-on sila karon, ini ang labing-una nga tion nga maka-abanse sila sa second round halin sang nakalab-ot sila sa conference finals sang 2015-2016.
Patigayunon ang hampang sa Smoothie King Center sa New Orleans, Louisiana nga home court sang Pelicans.
LAKERS VS. NUGGETS
Sa pihak nga bahin, ang pinaka-ginabantayan sang tanan amo ang hampang sang four-time NBA champion nga si LeBron James kag sang team sini nga Los Angeles Lakers batok sa defending champion nga Denver Nuggets 10:00 subong nga aga (oras sa Pilipinas).
Patigayunon ang Game 5 sa home court sang Nuggets.
3-1 na ang serye matapos nga nagdaog ang Los Angeles sa Game 4, 119-108, nga amo ang nagsalbar sa ila sa first-round elimination kag sa isa na naman ka makahuluya nga sweep nga natabo sang nagligad nga Western Conference finals.
Ang Game 4 sang Domingo amo ang labing-una nga tion nga nalutos sang Lakers ang Nuggets halin sang Disyembre 2022 kun sa diin may 11-game winning streak ang Denver sa pagpanguna sang two-time MVP nga si Nikola Jokic.#
