Ginakalangkagan kag ginabantayan ang mainit nga sambuwa sa Game 7 sa tunga sang Boston Celtics kag Miami Heat sa National Basketball Association (NBA) Eastern Conference Finals umpisa 8:30 subong nga aga oras sa Pilipinas.
Patigayunon ang hampang sa TD Garden, home court sang Boston.
Ginlista sang Heat ang guard nga si Gabe Vincent nga kwestyonable sa matchup bangud sa ankle injury; samtang duha-duha naman kun makahampang si Malcolm Brogdon para sa Celtics bangud sa iya forearm injury.
Ini nga 2023 Eastern Conference Finals amo ang ika-apat nga tion sa maragtas sang NBA nga nakabangon ang team gikan sa 0-3 nga serye kag nakahampang sa Game 7.
Pananglitan magdaog ang Celtics, sila ang labing-una nga team sa maragtas sang liga nga nakabangon sa 0-3 deficit kag makahampang sa NBA Finals.
Pananglitan magdaog naman ang Heat, sila ang ikaduha nga eighth seed nga makalab-ot sa NBA Finals matapos nga nahimo man ini sang New York Knicks sang 1999.
Ini ang ikatatlo nga tion na maga-atubangay sa Game 7 ang Heat kag Celtics matapos ang 2022 kag 2012. Sang 2012 daog ang Heat samtang sang 2022, daog ang Boston, 100-96. #
