Gindagdagan sang National Basketball Association (NBA) sang $75,000 ukon P4.3-million nga multa ang Minnesota Timberwolves center nga si Rudy Gobert bangud sang “unprofessional gesture” sini nga nagkwestyon sa integridad sang liga kag desisyon sang game officials.
Ini kasunod sang nakit-an sa Game 4 kun sa diin may “money gesture” si Gobert kadungan sang paglutos sang Denver Nuggets sa Timberwolves, 115-107.
Ginhimo sini ang gesture sang ginpituhan bangud sa foul sang kuatro minutos na lamang ang nabilin sa ikaapat nga quarter.
Matandaan nga nakuha man ni Gobert ang iya ikaapat nga NBA Defensive Player of the Year award sang nagligad lamang nga semana.
Apang antes ginmultahan, ginkonsiderar pa sang liga ang iya history sang indi husto nga aktwasyon sa game officials.
Namultahan man ini sang $100,000 ukon P5.7-million sang Marso 10 bangud sa kaangay man nga gesture sang nalutos ang Timberwolves, 113-104, sa overtime sa Cleveland.
Nahibaluan nga abanse na subong ang Nuggets sa serye, 3-2, sa Western Conference semifinals matapos ginlutos ang Wolves kahapon sa Game 5, 112-97.#
