Nagsaka na sa 5-0 ang matinlo nga record sang Oklahoma City Thunder sa NBA regular season subong nga tuig.
Ini matapos ginlutos ang host nga Portland Trail Blazers, 137-114, sa pagpanguna ni Shai Gilgeous-Alexander nga may 30 points, seven rebounds kag six assists.
Nagdugang si Jalen Williams sang 22 points, five rebounds, four assists kag four steals sa amo nga hampang nga amo ang ikalima nga sunod-sunod nga pagdaog sang Oklahoma City sa pagbukas sang season.
Wala sa starting line-up sanday Aaron Wiggins kag Cason Wallace apang pareho nga naka-13 points samtang si Isaiah Joe naman ang may 12 kag may 11 si Ousmane Dieng para sa Thunder.
Ini man ang pang-13 nga sunod-sunod nga hampang nga ginlutos sang Thunder ang Trail Blazers sa ila pagkit-anay sa NBA.
Sang nagligad nga season, isa sa ila hampang ang nagtakop sa 139-77. Ang 62 puntos nga abanse ang nalakip sa ika-lima sa pinakadaku nga abanse sa hampang sa NBA history.
Nagpanguna naman sa Portland si Jerami Grant nga may 17 points kag Deandre Ayton kag Rayan Rupert nga may tag-14.
Taklaron pa ang banas sang Trail Blazers nga nagsulod sa season nga may apat na ka kalutusan sa anum ka mga hampang.
Sunod nga atubangon sang Thunder 10:30 subong nga aga ang LA Clippers, samtang 10:00 sa aga man maga-atubang ang Trail Blazers sa Phoenix Suns.
