ILOILO CITY-Ginkumpirma sang National Bureau of Investigation Region 6 nga may na-monitor sila nga mga foreign nationals nga involved sa iligal nga mga buluhaton.
Sa interview sang Bombo Radyo kay Atty. Jeremiah Sargado, regional director sang National Bureau of Investigation Region 6, iya ginpahayag nga may mga Chinese nationals nga nagapanag-iya sang mga negosyo apang ginapapangalan sa mga Pilipino kag maathag ini nga paglapas sa anti- dummy law.
Suno kay Sargado, may mga foreign nationals man nga involved sa pagpameke sang produkto kag ang pinakaulihi diri amo ang kaso sang Chinese national nga nagabaligya sang peke nga mga sigarilyo kun sa diin minilyon ka pesos nga balor sang produkto ang nakumpiska sang damlag lang sa Iloilo City.
Suno sa iya, ini nagalapas sa intellectual property rights law.
Dugang niya, may yara man sang mga dumuluong nga naga-overstay, indi lang binulan kundi tinuig, kag ila ini ginatinguhaan nga makuhaan sang pangalan agud ma-refer ini sa Bureau of Immigration.
Pahayag sang natungdan, ini nga naga-overstay nga dumuluong ang posible may yara naman sang trabaho diri ukon naga-operate man sang kaugalingon nga negosyo.
Gin-athag naman sini nga wala sila sang na-monitor nga naga-operate sang Philippine Offshore Gaming Operators ukon cybersex den.
