Nagtukod na sang kaugalingon nga investigation team ang National Bureau of Investigation Region 6 bilang sabat sa direktiba sang Department of Justice nga magausisa sa mga ginadudahan nga anomaliya sa mga flood control projects sa rehiyon.
Sa interview sang Bombo Radyo kay Atty. Arnold Diaz, Assistant Regional Director sang NBI Region 6, iya ginpahayag nga siya ang magapanguna sa imbestigasyon kag subong yara pa lang sila sa stage sang pagtipon sang ebidensya.
Ginpabutyag niya nga kUn malocate na ang ginatawag nga ghost projects, magapatigayon sila sang ocular inspection kag mas madalum nga imbestigasyon.
Ginsiling man ni Atty. Diaz nga may koordinasyon sila sa mga ahensya sang gobyerno para sa mas epektibo nga pag-usisa.
Suno sa iya, sakop sang ila hurisdiksyon ang mga kaso nga may kalabutan sa Anti-Graft and Corrupt Practices Act kag posible nga plunder kun may nagakaigo nga ebidensya.
Gindugang pa ni Diaz nga indi lang sila magatutok sa ginpangalanan nga 15 ka contractors nga ginmention ni President Ferdinand Marcos Jr., kundi apil man ang mga local contractors kon makumpirmar nga may ghost projects kag substandard nga mga obra.
Nagpangayo man siya sang bulig sa publiko nga kon may nahibaluan sila nga impormasyon parte sa mga proyekto, magkoordinar lang sa NBI agud ini maimbestigaran.
