Buhion sang National Bureau of Investigation ang pag-imbestiga sang anomaliya sa 2019 SEA GAMES kun sa diin ang Pilipinas ang nangin host country sang amo nga tuig.
Ginpakamalot naman sang mga senator-judge nga sanday Sen. Robin Padilla, Sen. Alan Peter Cayetano, kag Sen. Pia Cayetano ang pahayag ni National Bureau of Investigation (NBI) Director Melvin Matibag nga magapatigayon ini sang imbestigasyon kaangot sa irregularidad sa bidding kag paggamit sang pondo para sa mga proyekto sang amo nga kahiwatan.
Nahibaluan nga sa pagsugod sang ikaanom nga adlaw sang trial ni Vice President Sara Duterte kahapon nga adlaw, ginkahangaw-an ni Sen. Padilla ang sunod-sunod nga imbestigasyon kag mga kaso nga ginapasaka batok sa mga senator-judges samtang ginapatigayon ang impeachment proceedings.
Yari pamatian ta ang nangin kabahin sang pahayag ni Senator-judge Robin Padilla.
Wala naman nahadlok ang anay Chairman sang 2019 SEA GAMES Organizing Committee nga si Senador Alan Peter Cayetano nga imbestigaran sang NBI.
Ginsabat man ini ni Cayetano nga suno pa sa iya kaangay nga ginapahog ini ni Matibag apang suno sa iya nga wala ini nahadlok.
Nagpangabay man ini nga sa pihak sang nagkalain-lain nga posisyon sa politika, magdaog sa gihapon ang ginasunod nga konstitusyon.
Gindepensahan naman ni Senator-judge Pia Cayetano ang iya utod kag nagpahayag nga kaangay ginatilawan lamang sang NBI nga iliko ang atensyon sang mga senator-judge sa ila obligasyon sa impeachment trial.
Suno kay Pia, kaangay gindungan gid ang imbestigasyon sa impeachment trial kay Vice President Sara Duterte kun sa diin may tinutuyo ini nga i-intimidate ang mga senator-judges.
Nahibaluan nga naka-schedule nga ipatubang si Director Melvin Matibag bilang witness sang House prosecution panel sa nagapadayon nga impeachment trial batok kay VP sara Duterte.
Maga-witness ini kaaangot sa Article IV sang Impeachment nga nagatalakay sa grave threats ukon pagpamahog nga ipapatay ni Duterte sanday President Ferdinand “Bongbong” Marcos Jr., First Lady Liza Araneta-Marcos, kag anay House Speaker Martin Romualdez.
Ginalauman naman nga maga-atubang si Matibag sa impeachment court sa adlaw sang Martes, Hulyo 21.
Samtang ginklaro naman ni Director Matibag nga wala ini nagapangita sang mahimo sini mapasaka nga kaso kay Senator Alan Peter Cayetano.
Pahayag sini nga ginarespeto gid sini ang Senado kag ang korte, apang nagpahayg ini nga natabo lamang nga nadala ang iya pangalan sa dapat nga ipa-imbistigaran gani wala ini sang mahimo kundi himuon ang iya nga obligasyon bilang nagapamuno sa NBI.
