NBI: ‘Fugitive Senator Dela Rosa will be arrested whether he likes it or not’

Ginpasalig sang National Bureau of Investigation (NBI) nga arestuhon nila si Senator Ronald “Bato” Dela Rosa bisan gusto man niya ini ukon indi.

Ini ang kabahin sang statement ni NBI Director Melvin Matibag matapos nagmandu ang ila lead agency nga Department of Justice (DOJ) nga dakpon na ang pugante nga senador.

Magluwas sa NBI, ginhatag man ni Justice Secretary Fredderick Vida ang mandu sa Philippine National Police (PNP).

Ini nga development ang kasunod sang pag-deny sang Korte Suprema nga ihatag ang ginapangayo ni Dela Rosa nga temporary restraining order (TRO) kag/ukon status quo ante order (SQAO) agud nga mapunggan ang gobyerno nga maserbe sa iya ang arrest warrant halin sa International Criminal Court (ICC).

Nagboto ang Supreme Court, 9-5-1, sa amo nga request para sa interim relief.

Pahayag naman ni Matibag, magahulag sila kag dakpon si Dela Rosa nga wala na sang ano man nga delay.

“The order is to arrest Senator Dela Rosa, so we’ll do so without delay,” suno kay Matibag. “In carrying out the arrest, we will strictly abide by the rules and ensure it is done professionally, as we always do.”

Dugang sini: “Fugitive Senator Dela Rosa will be arrested whether he likes it or not because we have to implement the law without fear or favor.”

Una naman nga ginpahayag ni Secretary Vida nga hatagan sang due process si Dela Rosa sa Pilipinas kag sa The Hague sa the Netherlands. Gindugang man sini nga nagakinahanglan man sang closure ang pamilya sang drug war victims.

“Iyong mga kababayan natin na naghahanap ng katarungan, ngayon patay na sila eh hindi na sila pwedeng kumuha ng abogado, hindi na sila pwedeng kumuha ng TRO,” suno sa tiglikom.

Si Dela Rosa ang hepe sang PNP sang ginpatuman ang drug war ni former President Rodrigo Duterte. Nauna na nga gindakop si Duterte sang 2025 kag nagahulat na subong sang trial sa ICC.#