ILOILO CITY-Nagpasar ang Iloilo City Council sang resolusyon nga nagakilala sang dako nga papel sang National Bureau of Investigation kag Philippine National Police sa dako nga development para sa madasig nga pagsolbar sang kaso sang twin shooting sa Syudad sang Iloilo.
Sa interview sang Bombo Radyo kay Iloilo City Councilor Ely Estante, author kag proponent sang “A proposed resolution commending the National Bureau of Investigation for the Quick Resolution of the Muehler-Britanico Twin Murders”, iya ginpahayag nga dako nga butang para sa pagsolbar sa kaso ang pagtumod sa mga suspek sa krimen.
Suno kay Estante, dalayawon man ang Philippine National Police bangud nagpatigayon man ini sang kaugalingon nga parallel investigation apisar nga ang National Bureau of Investigation ang nangamot sa kaso.
Nagpangabay man ang opisyal nga apisar mga pulis ang suspek sa krimen, indi dapat madalahig ang iban nga pulis nga maayo kag tampad sa serbisyo.
Nahibaluan nga suspek sa krimen sanday Police Corporal Joseph Andrew Joven kag Police Corporal Jerry Villanueva, samtang unidentified naman ang duha pa ka mga suspek.
