ILOILO CITY – Indi empleyado sang National Bureau of Investigation (NBI) ang isa sa duha ka mga nagpakilala nga agent sang NBI kag Philippine Army nga nagpadulong sa balay sang organizer sang Katilingban sang Imol sa Syudad (KAISOG) sa Brgy. Bitoon, Jaro, Iloilo City.
Sa interview sang Bombo Radyo kay Atty. Raul Quinto, assistant Regional Director sang NBI-6, iya ginpahayag nga wala sang Art Diaz nga empleyado ang NBI.
Sang ginpakita kay Atty. Quinto ang laragway sang nagpakilala nga Art Diaz, indi niya kilala ang nasambit nga tawo.
Sa pagkamatuod suno kay Atty. Quinto, ang empleyado sang NBI nga kaanggid sa pangalan ni Atty. Art Diaz amo si Atty. Arnold Diaz.
Magluwas nga indi kilala ni Atty. Quinto ang nagpakilala nga NBI agent, wala man sang ihibalo ang natungdan kun ano ang tinutuyo nanday Art Diaz kag Rey Gomez sa pagpakigkita kay Wilfredo Panuela nga organizer sang KAISOG.
Bangud sini, magapatigayon sang imbestigasyon ang NBI agud nga mahibalu-an ang matuod nga identity sang duha ka mga persona nga nagpakilala nga NBI kag Philippine Army agent.
