ILOILO CITY – Ginpasakaan sang kaso nga murder sang National Bureau of Investigation (NBI) ang 22 ka myembro sang National Capital Region Police Office (NCRPO) bangud sang kwestiyonable nga kamatayon sang pila ka high-profile inmates sa tion sang COVID-19 pandemic.
Suno kay NBI Director Eric Distor, magasunod sila sa ebidensya kag ibilin na sa mga prosecutors ang pagtan-aw sa amo nga butang.
Humalin sang Mayo tubtob Hulyo 2020, nagdangat sa walo ka high-profile inmates ang napatay sa New Bilibid Prison (NBP) lakip na ang convicted drug lord nga si Amin Boratong, Jaybee Sebastian, kag pila pa ka Chinese drug lords.
Suno sa Bureau of Corrections (BuCor), ang mga inmates ang napatay bangud sang paglapta sang COVID-19 infections.
Apang, nadiskubrehan sang NBI Death Investigation team nga may yara sang gina-alegar nga “criminal intent” sa kamatayon.
Suno kay NBI spokesperson kag Deputy Director Ferdinand Lavin, natukiban nga may yara sang sistema ukon pamaagi ang mga otoridad agud nga makakuha sang COVID-19 ukon paggwaon nga nagpatay bangud sa virus ang mga inmates.
Suno sa NBI, ang viral disease ang gingamit agud nga i-cover up ang gina-alegar nga pagpamatay sa mga high-profile inmates.
Ginpahayag pa sang bureau nga may ginakaptan sila nga mga witnesses kag inconsistent nga records sang BuCor, NCRPO kag sang NBP hospital.
