Ginkumpirma sang Department of Justice (DOJ) nga natalana na nga ipakigbahin sang Philippine National Police (PNP) ang mga nakuha nila nga ebidensya sa National Bureau of Investigation (NBI) may kaangtanan sa kamatayon ni Christine Dacera — ang flight attendant nga nasapwan patay sa sulod sang City Garden Hotel sa Makati City.
Suno kay DOJ Sec. Menardo Guevarra, ang mga ebidensya nga nakuha sang PNP ang ihatag sa NBI kag ini ang ginalakipan sang specimen, garments kag mobile phones.
Pahayag niya, lauman nga sa masunod nga semana makumpleto na sang NBI ang ila imbestigasyon.
Nahibaluan nga nagcheck-in si Dacera sang Disyembre 31, 2020 sa nasambit nga hotel kaupod ang iya mga abyan agud nga magselebrar sang bag-ong tuig.
Apang Enero 1, 2021 sang ini ang nakit-an nga wala na sang kabuhi sa sulod sang bathtub.
Nagapati ang pamilya Dacera nga may natabo nga krimen sa pagkapatay sang flight attendant sa apisar nagguwa ang resulta sang autopsy sang PNP Crime Laboratory nga “natural causes” ang kamatayon sang dalaga.
Sa medico legal report halin sa Crime Laboratory, nasaad nga “ruptured aortic aneurysm” ukon paglupok sang mayor nga ugat nga tuga sang mataas nga blood pressure ang rason sang kamatayon ni Christine.
