Magapagwa sang mga subpoena ang National Bureau of Investigation (NBI) sa Lunes, Hulyo 20, batok sa pila ka anay nga opisyal sang Philippine Southeast Asian Games Organizing Committee (PHISGOC) bilang kabahin sang ila fact-finding investigation may kaangtanan sa paggamit sang pondo para sa 2019 Southeast Asian (SEA) Games.
Suno kay NBI Director Melvin Matibag, lakip sa ipatawag amo sanday anay PHISGOC Chief Operating Officer Ramon Suzara, Chief Financial Officer Dexter Estacio, Corporate Secretary Lester Bensuceso, kag iban pa nga mga board members.
Sa subong, wala pa sang pahayag sanday Suzara, Estacio, kag Bensuceso may kaangtanan sa plano sang NBI nga magpagwa sang mga subpoena.
“Sa Lunes po, mag-i-issue tayo ng subpoena… maimbitahan si Ramon Suzara, si Dexter Estacio, John Lester Binsuceso at iba pang director. Testificandum and duces tecum po ito,” suno sa NBI director.
Dugang niya: “Hawak ko na rin dito yung mga financial statements na may rental na nagastos, P650 million, P300 million plus na consultancy. Tsaka nakuha ko na rin po yung audited financial statement ng kampanya na ito.”
Talalupangdon nga wala sa listahan si Senator Alan Peter Cayetano, anay chairman sang PHISGOC, nga una na nga nagwangal batok sa plano sang NBI.
Sa iya Facebook live kahapon, ginhangkat ni Cayetano ang NBI, Department of Justice (DOJ), kag Malacañang nga padayunon ang imbestigasyon sa SEA Games nga iya anay ginpangunahan basta sa kondisyon nga imbestigahan man sang minorya sa Senado ang mga iregularidad sa flood control projects.
Una na nga gin-anunsyo ni Matibag ang pagtukod sang isa ka task force nga magaimbestigar sa ginapahayag nga mga iregularidad sa bidding kag paggamit sang pondo para sa amo nga hinampang.
