Nagtanyag ang National Bureau of Investigation (NBI) sang P50,000 nga reward sa makahatag sang impormasyon kaangot sa nahamtangan sang isa ka Alice Leal Guo nga ginapahayag nagagamit sang address nga Quezon City.
Ini nga Alice ang nagkuha sang clearance sa NBI sang 2005 apang wala nagasanto ang iya fingerprints sa iya ni Alice Guo nga mayor sang Bamban, Tarlac.
Gusto sang ahensya nga usisaon ang amo nga persona kaangot gihapon sa imbestigasyon sini sa mga ginpangbulgar sa Senate hearings halin pa sang nagliligad nga semana.
Base sa NBI clearance records, may duha ka babaye nga may pangalan nga Alice Leal Guo isa halin sa Bamban, Tarlac kag isa halin sa Quezon City.
Si Bamban, Tarlac Mayor Alice Leal Guo ukon si Guo Hua Ping amo ang nag-atubang sa Senate committee hearings, apang wala pa subong sang hinalung-ong ang otoridad kun sa diin eksakto nahamtang ang isa pa ka babaye nga may amo man nga pangalan.
Base sa teorya ni NBI director Jaime Santiago, possible nga may nagsugo sa babaye nga magkuha sang NBI clearance gamit ang amo nga pangalan nga may birthdate nga July 12, 1986 kag birthplace sa Tarlac.
Wala pa naathag kun ano ang kaangtanan sa tunga sang duha ka mga Alice Leal Guo apang ginapatihan ni Senator Risa Hontiveros nga ginkuha sang mayor sang Bamban ang identity sang Alice Leal Guo halin sa Quezon City.
Matandaan nga sang nagligad nga semana sang nabuyagyag nga nagsanto ang fingerprints sang mayor sang Bamban kag sa Chinese national nga Guo Hua Ping — ebidensya nga nagapamatuod nga isa lang sila ka persona.
