Gin-anunsyo sang Malacañang nga nag-isyu na sang subpoena ang National Bureau of Investigation (NBI) sa tatlo ka vloggers nga ginatudlo nga nagpalapta sang sala nga impormasyon kaangot sa ikaayong lawas ni President Ferdinand “Bongbong” Marcos Jr.
Suno kay Palace Press Officer Atty. Claire Castro, gin-forward sang Presidential Communications Office (PCO) sa NBI ang dokumento para sa insigida kag madalom nga imbestigasyon sa vloggers.
Ginpagwa ang subpoena suno sa iya para sa nagakaigo nga imbestigasyon.
“Opo, ang binigay po na dokumento ng PCO para sa agarang malalimang pag-iimbestiga sa mga vloggers na nagpakalat ng peke patungkol sa kalusugan ng ating Pangulo, ito po ay nai-forward na po sa NBI at nagkaroon na rin po ng subpoena sa tatlong vloggers para sa karampatang pag-iimbestiga ng NBI,” suno kay Castro sa press briefing subong nga adlaw.
Gin-identify sang Palasyo ang tatlo ka accounts nga amo ang “Crage Anderpal,” “Rigondola Ping,” kag “Iloy Bugris: The Queen of Revelations.” Si “Iloy Bugris” amo ang Ilongga social media personality nga si Jinky Miraflores Carpio.
Matandaan nga sang Abril 15, gin-endorso sang PCO ang tatlo ka nasambit nga social media accounts sa Department of Justice (DOJ) para sa imbestigasyon kag nagakaigu nga legal action.
Ginaalegar sang PCO nga naghimo sang live broadcast ang “Iloy Bugris: The Queen of Revelations” nga naga-claim nga “critically ill” si Marcos.
Ginpahayag naman nga nagpaguwa ang account nga “Rigondola Ping” sang fabricated nga mga laragway nga nagapakita nga yara sa physical distress ang presidente.
Suno pa sa PCO, nag-share naman ang “Crage Anderpal” ang “fake news graphics” nga naga-claim sang supposed official confirmation nga may yara sang seryoso nga health condition ang presidente.
Matandaan nga pila ka beses naman nga ginpanginwala sang Malacañang nga may seryoso nga balatian ang presidente matapos naglapta ang mga espekulasyon sa social media halin pa sang nagligad nga bulan.
Mangin si Marcos ang nag-jumping jack, nagdalagan, kag naghakwat sang bugas sa atubang sang media agud pamatud-an nga buhi siya kag wala sang ginasuprer nga seryoso nga balatian sa lawas.#
(Right Photo: Iloy Bugris: The Queen of Revelations/FB)
