NBI suguran na ang imbestigasyon sa ginapahayag plano nga pagpa-patay ni Rep Trenas sa city councilor

ILOILO CITY – Suguran na sang National Bureau of Investigation ang pangabay ni Iloilo City Councilor Plaridel Nava nga imbestigasyon sa ginapahayag plano nga pagpa-patay sa iya ni Rep. Jerry Treñas.
Magapanguna sa imbestigasyon si NBI special investigator Mornio Palencia, sa diin posible nga una sini nga ipatawag ang negosyante kag anay kandidato sa pagka-alkalde nga si Rommel Ynion agud kuhaan sang affidavit.
Si Ynion ang ginapahayag nakabati sa plano kuno ni Trenas nga patyon ang konsehal.
Suno kay Nava, yara sa balay sang napatay nga drug lord nga si Melvin Odicta si Ynion sang ginaalegar nagtawag si Trenas sa drug lord kag santo sa iya nabatian nga ginhambalan sang duha, luyag nga ipa-patay sang kongresista si Councilor Nava.
Nahibaluan nga nagpangayo sang bulig sa NBI si Nava matapos mabuyagyag ang nasambit nga impormasyon.
Una na ginpanginwala ni Trenas ang akusasyon kag nagpanindugan nga indi sini kilala si Odicta kag wala sang rason suno sa kongresista para iya ipa-patay ang city councilor.