Nagtanyag ang National Commission for Culture and the Arts (NCCA) nga ila pintahan kag panamion ang mga commercial sites sa City Proper agud makaganyat sang mas madamo nga mga turista kag mapasanyog pa gid ang heritage tourism sang syudad.
Suno kay Mayor Raisa Treñas, ini isa ka maayo nga oportunidad para sa syudad kag nagapasalamat ini nga siya ang nagapungko nga alkalde sang gintanyag ini sang commission.
Natalana nga magpadulong sa Iloilo City sa Hulyo 13 ang mga tiglawas sang NCCA para mahitso ang memorandum of agreement kaupod ang city government.
Suno sa alkalde, sa subong, nagapadayon ang pagtakos sa mga buildings nga pintahan agud matumod kun ano kadamo nga pinta ang kinahanglanon.
Nagpanawagan man ini sa mga engineers kag architects nga luyag magbulig.
Nahibaluan nga ginakabig nga heritage zone ang bilog nga JM Basa Street nga kilala man bilang Calle Real bangud sa mga heritage buildings nga napreserba sang mayo.
