Nagakinahanglan ang National Dairy Authority (NDA) sang dugang nga pondo agud mapataas ang milk output sang pungsod kag mabuligan ang local producers nga malab-ot ang indi magnubo sa 5 percent sang milk requirement sang Pilipinas sa 2028.
Suno kay NDA Administrator Marcus Antonius Andaya, ang pag- improve sang milk self-sufficiency rate sang pungsod ang nagakahulugan sang dako nga investments.
Suno sa iya, kulang ang current budget sang ahensya agud malab-ot ang target nga mag- improve ang milk self-sufficiency.
Pahayag ni Andaya, natalana nga magbaton ang ahensya sang P537 million sa idalom sang 2025 National Expenditure Program (NEP), mas mataas sa 2024 budget nga P522 million.
Dugang niya, kun ini ang madoble, magadoble man ang milk production.
Target sang ahensya nga attached sa Department of Agriculture nga magpataas sang annual domestic production sa 80 million liters, katumbas sang 5 percent milk self-sufficiency pag-abot sang 2028.
Base sa data sang NDA, ang milk production sang 2023 naglab-ot sa 28.86 million liters.
Sa first half subong nga tuig,ang output naglab-ot sa 16.02 million liters base sa data sang NDA.
