ILOILO CITY – Ginsabat sang National Democratic Front of the Philippines (NDFP) ang pagpanghangkat ni Presidente Rodrigo Duterte nga untatan na sang komunista nga grupo ang pagpakig-away sa gobyerno.
Sa interview sang Bombo Radyo Iloilo, ginpahayag ni Concha Araneta-Bocala, isa sa mga NDF consultant kag miyembro sang negotiating panel, indi madula ang rebolusyon bangud nagapangita sang pagbag-o ang mga tawo.
Ini matapos ginpahayag ni Presidente Rodrigo Duterte sa opening ceremony sang Palarong Pambansa nga 50 na ka tuig nga nagapakigbato kag ginapatay sang kaangay nila nga Pilipino ang komunista nga grupo.
Pero suno kay Araneta-Bocala, tiyempo pa ni Andres Bonifacio may yara na sang rebolusyon.
Wala man magustuhan sang NDF ang kondisyon ni Duterte kaangay sang pag-untat sang pagpanukot sang revolutionary tax kag dapat hilwayon sang komunista nga grupo ang ila mga prisoners.
Suno kay Araneta-Bocala, indi dapat maghatag sang kondisyon ang Presidente, sa baylo dal-on ini sang gobyerno nga agenda nga ginatalakay sa peace talks.
Maathag suno sa NDF sa Hague Declaration, nga dapat wala sang kondisyon ang peace talks.