ILOILO CITY – Nagapakig-angot na ang Task Force Boracay sa National Disaster Risk Reduction and Management Council (NDRRMC) para sa pagpaidalom sa Boracay sa state of calamity sa labing madali nga panahon.
Paathag ni Department of Interior and Local Government (DILG) Assistant Secretary Epimaco Densing III nga amo man ang chairman sang Task Force Boracay sa interview sang Bombo Radyo Iloilo, ang NDRRMC ang dapat magrekomenda kay Presidente Rodrigo Duterte sang deklarasyon sang state of calamity para sa isla.
Suno sa opisyal, ila pa ikonsulta sa NDRRMC ang proseso sa pagdeklarar sang state of calamity.
Gin-athag naman ni Asec. Densing nga la-in man nga isyu ang pagpasirado sang Borcay sa deklarasyon sang state of calamity.
Samtang ginpahayag sang opisyal nga madamo gihapon sang salawayon nga mga resort owners sa Boracay sa pihak sang crackdown nga ginapatuman sang ahensiya sang gobyerno.
Gintumod ni Densing ang West Cove resort nga sadto ginbakbak ang ginpatindog nga illegal structures.
Pero sa karon suno kay Densing, liwat nga nagtukod sang taytay ang amo nga resort agud maagyan sang mga turista.